SI MAN OGEN : Pilipi 2:4-11
T E M A : NGUMBAN PERUKUREN KRISTUS
T U J U N : Gelah Moria:
- Nggargari perukuren Kristus.
- Ncidahken perukuren Kristus i bas geluh teptep wari.
METODE PA : Meditasi
Kata Penaruh.
Persikapen:
- Pengurus Moria nikapken lilin, pemusik, song leader ras sekalak pemipin (P) ibadah (niarapken pendeta, vicaris, detaser entah pertua/diaken). Kebaktin enda ilakoken alu mengalir.
- Kerina Moria nikapken Pustaka Si Badia, KEE ras pulpen, kertas. Kundul alu posisi tegak (la tertande) dingen asa bancina atur jarak ula si degesen sada ras sidebanna.
- Lagu-lagu bas PA enda enggo ipelajari sope denga ilakoken meditasi.
P : Senina Moria, si bengketi me kebaktin meditasita, si peteneng dirinta, tarik napas alu manjar-anjar, janah buang. Silakoken si e telu kali. Alu dem ketenenggen muliakenlah Tuhan, kataken bujur i bas kerina si enggo ilakokenNa i bas geluhta, mari si tamaken tanta si kemuhen ku tententa janah kataken man tendinta muliahkenlah Tuhan o tendingku (bereken waktu teneng kentisik janah musik mengalun.) Bas pusuh si mbagesna nari si penangkih dage enden-nden pujinta “Muliakenlah O Tendingku” (iendeken 3 kali.)
Muliakenlah o tendingkku, muliaken Tuan DIbata o tendingku
Muliakenlah, muliakenlah, muliaken Tuhan o tendingku
P : Senina Moria, Dibata e mulia dingen erkuasa kap. ItandaiNa alu mbages ise kam ras aku. La lit sada pe terligen sada pe lang; seh ku bas perukurenta ietehNa kap. IA me Dibata si Badia, e maka kalak si nembah man baNa pe arus kap badia. Nulih kita ku bas kecibal geluhta, i bas perbahanen pengerana ras perukuren si lit, enggo nge ndia badia. Perbahenen si uga nge silakoken sedekah enda? Enggo nge lit kiniersadanta alu mereken dirinta guna kiniulin enterem jelma? Entah keegoisen, la nggit talu, menang sendiri, tole perbahanen-perbahanenta guna kepentingenta saja ngenca lalap silakoken. Curmini dage perbahanenta sedekah enda, pantas nge ndia kita ikataken anak-anak Dibata?
Paksa teneng
(Song Leader ngendeken KEE 207:5 alu manjar-anjar)
Salahku gejap, bas kegeluhenku, penalemenku e tetap perkuah atendu
Ref.: Reh aku Tuhan ngadap man bandu, Jesus dudurkqn tan’Ndu alokenlah aku
P : Ranan si uga nge rusur ibegi Dibata bas babahta nari. Enggo nge rananta e maba pasu-pasu entah palu-palu, nambahi semangat entah nguraki semangat geluh kalak sideban, mereken dalan pulah entah nambahin baban geluh?
Paksa teneng
(Song Leader ngendeken KEE 207:5 alu manjar-anjar)
Salahku gejap, bas kegeluhenku, penalemenku e tetap perkuah atendu
Ref.: Reh aku Tuhan ngadap man bandu, Jesus dudurkqn tan’Ndu alokenlah aku
P : Perukuren si uga nge si idapeti Dibata i bas kita? Uga nge ndia bagesna perukuren Kristus e si umban bas caranta rukur? Rusur sikataken buah perukuren e me perbahanen ras pengerana. Kiniganjangen rukur, rikut ras ngukurken keperlun dingen perbeben geluhta (dirinta saja) mahan bana erbahanca lupa kita rukur kerna kalak sideban. Rukur kerna kiniulin dingen kemulian Dibata pe. Dahilah Dibata, tadingkenlah kerina cara rukur si la payo. Enda aku Tuhan ajari dingen pekena-kenalah cara rukurku bagi perukurenNdu….
Siakuken salah Lepakta arah nden-ndeta “Salah ku gejap”
(KEE 207:5, iendeken 2x, Khusus Ref iendeken 4x)
Salahku ku ggejap bas kegeluhenku, Penalemenku e tetap, perkuah atendu
Ref.: Reh aku Tuhan ngadap man baNdu, Yesus dudurken taNdu alokenlah aku
P : Kalak si reh alu pusuh si getem erkiteken salah dosana ialo-alo Tuhan kap. Enggo icidahkenNa si man usihen man banta, iberekenNa geluhNa ras darehNa i Golgolta guna kiniulin, keselamaten manusia. Jesus kap Sumbul si erbahanca kegeluhenta badia, e maka katakenlah bujur man Bapa si erbahanca melikas kerina dosa si ndube segelah si aloken kesenangen e sabap lit kap sada sumbul e, e me Jesus.
Rende : “Lit Me Kap Sada Sumbul E: (KEE 83:1,2,4)
1) Lit me kap sada sumbul e guna perdosa e, mehhuli kal me sumbul e, pesenang ukur e
2) Lau sumbul si badia e, e ibas Yesus nge, IalemiNa dosanta, ras keberatenta
4) B’re min o Tuhan aku pe bersihh ibaan Ka, kelengi tendingku min, maka terkelin kin
P : Ngumban ertina ngusih biak entah menam seri ras kalak sideban. Ngumban perukuren Kristus e bali ras ngusih perukuren Kristus, seh dungna perukurenta enggo bali ras perukuren Kristus. Uga kin perukuren Kristus?
Paksa Teneng
Nggit nadingken si nasa lit guna manusia. Jesus e Dibata, IA me anak Dibata si Tonggal, rupa Dibata si teridah, IA me sinalsal terang kemulian Dibata, IA sada ras Bapa. Status si enda kerina la ipertahankenNa tapi ilepaskenNa. Arah ukurNa jine itadingkenNa jadi seri ras manusia. lpilihNa nggeluh bagi manusia. Kemulian, keduduken, kinibayaken, kerina hak Surga. Nggit IA erkorban ngaloken kiniseran, perbahanen si jahat, ipalitken si jahat ras kematen si la semal (ianggap jadi kutuken) e me i kayu persilang. ItadingkenNa kerina hak istimewa ras kemulianna i Surga guna nelamatken manusia.
Paksa Teneng
Nggit nggeluh bagi sekalak juak-juak, nggeluh ikuasai tuanna, labo pegawai si ndatken upah. Patuh nandangi tuanna, ras ngelakoken kai pe guna pesenangken tuanna. Bagi si eteh maka jadi juak-juak e me sada dahin si mesera kal ngalokenca, tapi e ilakokenNa; ngelai dingen nggit erkorban nandangi enterem jelma. Si e kerina ncidahken kiniteruken ukurNa.
Paksa Teneng
Rende : KEE 83:3
Dareh Tuhanta Jesus e, sumbul si benar nge, mambur i kayu silang e, lah ngepkep kita nge
P : Jesus ipehaga Dibatanta alu mereken kerina kuasa si lit i Surga ras i doni. Manusia ras doni enda ngakuken maka Kristus tuhu-tuhu Tuhan.
Paksa Teneng
P : Moria si ikelengi Tuhan, kiniteruken ukur e mahan bana ngasup kita mereken si mehulina guna pehuliken. Nggeluh bas kiniersadan, ngukurken kiniulin si nterem ras dem bas kekelengen. Erkorban guna kiniulin kalak sideban e me bagin biak si man umbanen. Bas si enda biak ke-aku-an-ta arus sitadingken. Ke-aku-an e maba keegoisen, terjeng ngukurken kepentingen ras dirina saja ngenca. Kalak si bagenda rugi kal akapna erkorban, sabap bas perukurenna uga segelah ngerehken untung man dirina. Sirangilah perukuren si bagenda, inget! Kita kap anak-anak Dibata.
Rende: KEE 200:2)2X
O Tuhan sampatlah geluhku gundari, ola Kam erleka ras aku
Kawali geluhku suari ras berngi, lalap Kam me ku ban temanku
P : Kalak si meteruk ukur ipehaga Tuhan kap, tuah jadi sekerajangenNa sabap isehken Dibata padanNa man bana. Alu kata sideban abo lit rugina ngelakoken kai silakoken Kristus e bas pelayanen. Nggeluhlah i bas kiniteruken ukur sabap kam kap anak-anak Dibata.
Rende: KEE 200:3
O Tuhan bengketi pusuhku min gelah, maka ku aloken kataNdu
Pedahndu lalap min ku gelem la pulah, lalap kam me ku ban temanku
P: I bas paksa enda ibereken kesempaten nehken dingen pengarapen man Dibata segelah ipengasupNa kita guna ngumban biak meteruk ukur subuk bas jabu, perpulungen, gereja ras masyarakat.
(Ibereken waktu man perpulungen gona ertoto nehken pingko-pingko dingen pengarapen man Dibata)
Kenca situngtungken pengarapenta man Dibata, mari dage tulisken kai si jadi padanta (nulisken komitmen 3-4 kata). Tedislah gelemlah padan e, pindo gegeh man Dibata guna ndalankenca.
Gundari tatap temanndu e, kataken “Tuhan mpegegehi kam teman, dalankenlah padanndu e”
Mari radu ras kita rende KEE 183:3 (endeken 3x)
Kekeken ngikut Jesus, mbelin kuasaNa
Bas kurang kal gegehta, je isampatiNa
Ola penalem saja, gegehta la serta
Ertotolah man baNa, pindo penampatna
P : Kenca si aloken Kata Dibata, si endesken dage geluhta guna ipake Tuhan. Sigejapkenlah maka kerina si lit enda guna kemulian Tuhan, sicidahken keriahen ukurta alu maba persembahen si merimna man baNa.
Si puji Tuhan bas kita nehken persembahen alu rende arah KEE 420
Asa gegeh ras kengasupen, kgrni nehkgn persembahen
Endesken kami baNdu Tuhan, alu dem keriaen
Reff : Ajari kami ngergaken, talenta ras kiniliten
Arah ukur ras perbahanen, Tuhan ipermuliaken
Mbue tuhu kami aloken, pasiu-pasuNdu o Tuhan
KelengNdu i gejapken kami, Kam kap sinegu kami
Reff :
P : Mari ras ertoto kerna persembahen (kenca si e itutup alu pertoton Tuhan.)
Mari radu ras ertoto bagi siniajarken Jesus man ajar-ajarNa ninta dage ras-ras…
