BIMBINGAN PA MAMRE
TANGGAL, 21 APRIL – 27 APRIL 2024
Teks : Lukas 10:25-37
Tema : Erkuah ate ras nampati
Tujun : Gelah Mamre :
1) Meteh kerna palas kalak Samaria si erkuah ate ras nampati.
2) Terus ngelumbaken nehken kekelengen man kalak si perlu isampati.
1. KATA PENARUH
Erguna man kalak sideban eme salah sada sasaren pelayanen Gerejanta Tahun 2024 enda. Ertina Seh ija kehadiren Gerejanta ternanami kalak sideban manfaatna membangun dirina jadi salah sada indikator keberhasilen sasaren pelayanenta. Mamre GBKP subuk secara institusi bagepe secara pribadi tentu berpengaruh mbelin mensuksesken sasaren pelayanenta enda. Guna mperlengkapi kita banci nehi pendilo Tuhan sue ras sasaren pelayanenta enda, mari sisiksiki (Telaah) Kata Dibata si jadi pengogenta enda.
2. URAIAN TEKS
Guna njabab penungkunen sekalak guru agama Yahudi si ersura-sura ncubai Jesus alu nungkun kerna kai si arus ilakokenna gelah ngaloken kegeluhen si rasa lalap (ay 25), awalna Jesus nungkun balik ia (gelah ula Jesus si erban statement seh maka la banci isalahkenna Jesus) kerna kai kin sitersurat i bas hukum taurat kerna Si e (ay 26). Alu percaya diri guru agama e njabab penungkunen Jesus e : “Kelengilah Tuhan Dibatandu… ras kelengi pe temanndu manusia…” (ay 27). Jesus ngayuken kata Pustaka e ras menegasken man guru agama e gelah ndalankenca : “..Bahanlah bage, gelah ialokenndu kegeluhen sirasa lalap” (ay.28). Nggo terjabab situhuna penungkunen guru agama e, tapi lenga akapna dung sebab atena kin nalahken Jesus. E maka guna pebujur-bujur bana, isungkun guru agama e ka tole kerna ise kin temanna manusia (ay29). Jesus ngidah maka Upaya pebujur-bujur bana alu motif ncubai/ ndarami salah Jesus enda harus ipepinter / ipekena. Guna si enda me Jesus erban perumpaan kerna Kalak Samaria si erkuah ate e jadi sukat-sukat man guru agama e menilai dirina. 3 oknum si mentas arah dalan Yerusalem nari ku Yeriho ngidah kalak si irampok e — la saja barangna irampuk tapi pe igudami seh menam mate. Sipemena mentas eme Imam kalak Jahudi (simpeseh sura-sura penyembahna man Dibata). Tapi la isampatina korban perampuken e. Kenca si e mentas ka kalak Lewi (si erdahin i bas rumah pertoton), Ia pe labo isampatina. Kenca si e mentas kalak Samaria, kenca idahna minter isampatina alu nuci lukana alu anggur, nambarisa alu minak zaitunna, mbalut lukana, mabasa ku penginapen alu kaldena, irawatna ras papagina ititipkenna man si empu penginapen alu mereken 2 dinar janah nina ‘adi kurang kari belanjakenndu, reh aku pagi kutambahi. (ay 30-35). Kenca dung perumpamaan e ipesehNa, minter isungkun Jesus guru agama e kerna ise kin (dage) teman manusia man kalak sirampok I bas perumpamaanna e (ay 36). Nina guru agama e ngaloi :“Kalak singgo nampati ia”. Itegasken Jesus maka la cukup ietehna saja hal erkuah ate ras nampati temanna manusia, tapi harus pe ilakokenna. Emaka nina Jesus : “Kam pe laweslah, bahanlah bage” (ay.37)
3. PENGKENAINA
Tema: Erkuah Ate ras Nampati. Enda me biak Dibata Biak Dibata enda me si igambarken Jesus selaku kalak Samaria si ekuah ate e I bas perumpamaan e. Perdalanenna nusur I Yerusalem nari ku Jeriho eme gambaren perdalanen Jesus i Surga nari ku doni si nggo ceda. Idapetina me kita singgo kena rampok dosa ras kerincuhen doni si erbahanca kita nggo menam mate. Nggeluh ia jadi manusia nemani, mbersihken ras nambari lukanta alu darehna, iangkatna ras itaruhkenna ras irawatna kita ku rumah pertoton dingen nangkih ia ku Surga alu nitipken kita guna ipekena-kena i bas Rumah Pertoton.
Biak Dibata si perkuah ras nampati enda pe si harus/ si oratna pe nggeluh I bas dirinta selaku Mamre (Perbapaan Kristen — si nggo leben nggejabken kita nggeluh erkiteken perkuah ate ras penampat Dibata jine). Piga-piga point biak Dibata siperkuah ras nampati e banci usih rikutken teks ogenta Lukas 10:25-37 enda eme :
1) Kalak Samaria rikutken pengakap kalak Jahudi la meherga/ badia tapi kalak Samaria nehken perkuah ate ras nggit nampati. Kinitekenta teridah alu perbahanenta i bas ngkelengi jine kap.
2) Mbue meteh Kata Dibata/ Pustaka Sibadia bahken si erdahin ras nggeluh I bas Rumah Pertoton sekalipe adi labo ngkelengi, labo kepe ngena ate Tuhan. Kiniteken adi labo teridah arah perbahanen, mate kap!!!
3) Erkuah Ate ras Mediate menuntut pemere/ pengorbanen jine kap. Bagi Dibata ngkelengi kita manusia alu “mereken” anakna si tonggal jadi manusia, ngenanami kiniseran seh mate i kayu persilang eme bukti pengorbanen Dibata guna keselamatenta si tek man baNa; Bagi Kalak Samaria ‘mereken’ perlengkapen si arusna guna pribadina (anggur, minak, kelede tumpangen, perawaten ras senna man pemilik penginapen e), bagem me pe arusna kita Mamre : Tandana kita ngkelengi teridah arah kininggitenta/ kerelanta berkorban waktu, tenaga, dana, ntah kai si lit bas kita guna nampati kalak sideban.
4) Sen si ibere kalak Samaria man pemilik penginapan (I bas perumpamaan e) eme gambaren pemere Dibata man Gereja (selaku institusi bagepe pribadi/ Mamre) si ititipken Tuhan guna ipakeken Gereja merawat jemaat si nggo iselamatkenna e. Janah Adi kurang denga pasti itambahina. Bage me Tuhan kepe ncukupken kerina kebutuhen pelayanenta adi si pakeken guna merawat kiniteken perpulungen, Ertina, ije me kepe pasu-pasu Tuhan man kalak si ngkelengi/ si erkuah dingen nampati e. Amin.
Sekalak Mamre si la pernah nggit tading muat bagin I bas dahin Diakonia Gerejanta pernah ersaksi man kami : Maka ia la pernah nggit tading I bas dahin-dahin nampati kalak si deban erkiteken igejabkenna maka “Pemere Dibata lalap galangen asangken kai sikubereken — sekop pasir si kupake muat pasir guna ibagiken man kalak siperlu, ndauh kel kitiken asangken sekop Tuhan nambahi lumbung pasirku” Nina.
4. DISKUSI RAS AKSI
1) Rikutken ogenta, perbahanen kai saja sibanci jadi usihen Mamre kerna sikap/tindaken kalak Samaria si perkuah ras mediate e?
2) Turikenlah kai perbahanen si mehulisi banci ibahan mamre man kalak si deban, subuk secara pribadi, jabu ntah pe sektor tandana kita erkuah ate ras mediate?
USULEN ENDE-ENDEN
1) KEE GBKP No. 195 : 1 (lulihi 2x) Ise Nge Ndia Si Banci Nampatisa
2) KEE GBKP No. 290 : 1-3 Labo Erkiteken Beluhku
3) KEE GBKP No. 402 : 1-3 Perban KekelengenNdu
4) KEE GBKP No. 282 : 1-3 Kukataken bujur baNdu
5) KEE GBKP No. 381 : 1-2 Sura-Sura Yesus Bangku
