Sl MAN OGEN : Roma 16:3-4
TEMA : ERBERITA JADI ORAT NGGELUH
TUJUN : Gelah Moria:
- Erlajar arah Persila ras Akuila si mere dirina guna er-Berita Si Meriah dingen njagai pengajaren.
- Mpertahanken kiniteken arah kesaksin ras perbahanenna.
METODE PA : Story telling (nuri-nuri)
Kata Penaruh.
Sada kalimat si labo asing si begi e me “Long life education” ertina erlajar segedang geluh. Konsep erlajar segedang geluh enda icetusken sekalak filsuf Amerika John Dewey, ikatakenna maka segedang geluh manusia melala ndatken pengajaren ras pengalamen si labo ngenca arah pendidiken formal tapi pe arah kerina dampar kegeluhen manusia teptep wari. Konsep enda mabai manusia guna erlajar mpesikap geluhna gelah reh ulina. Janah salah sada inganta erlajar e me arah Gereja tupung kita ngikuti kebaktin minggu, PA, PJJ ras sidebanna. Ngajar ras erlajar e me sada proses si tetap idalanken i bas perjumpan-perjumpan ndai sabap enda me si ipedahken Tuhan Jesus, “Enggo ibereken Dibata man bangKu kerina kuasa i Surga ras i doni. Laweslah ku kerina bangsa manusia bahanlah ia jadi ajar-ajarKu; peridiken ia i bas gelar Bapa, gelar Anak ras gelar Kesah Si Badia, janah ajari ia ngikutken kerina si enggo Ku pedahken man bandu. Janah ingetlah! “Aku tetap kap ras kam seh ku kedungen jaman.” E maka Gereja e me ingan “Pemuridan” ertina sada proses erlajar si mabai kita reh dewasana secara kiniteken, i je lit perjumpan ras Dibata bage pe ras teman manusia jenari proses enda terus menerus seh maka kita pe banci ka ncidahken usihen si mehuli nandangi sekelewetta.
Mpebagesi Pengangkan kera Ogen.
Perjumpan Paulus ras Akuila bage pe ndeharana Persila sekitar tahun 49 M erkiteken situasi politik bas paksa e erbahansa reh belangna Berita Si Meriah. Kalak enda radu erdahin erbahan kemah e maka Paulus kesilang i rumah Akuila ras Persila sada setengah tahun dekahna. Kalak enda ras-ras i bas meritaken Berita Si Meriah janah ibaba Paulus pe Persila ras Akuila ku Epesus. Tupung Paulus nerusken perdalanenna, Persila ras Akuila tading i Epesus. Paksa e lit sekalak Jahudi si tergelar Apolos ngerana kerna Pustaka Si Badia, iajarkenna kerna Jesus alu payo tapi peridin Johanes ngenca ietehna. Meteh kerna si enda, Akuila ras Persila maba Apolos ku rumahna jenari iturikenna man Apolos kerna dalan kegeluhen si ituduhken Dibata (Perbahanen Rasul 18:24-26). Ulihna Apolos lawes ngepar ku Propinsi Akaya jenari erberita ia i je. Persila ras Akuila jadi orangtua rohani (mentor) man Apolos.
Ikataken Paulus pe maka Persila ras Akuila e me temanna sada dahin i bas Kristus Jesus, janah ia ras keluarga Akuila bagi kalak si erkandu-kandu. Isaksiken Paulus jine uga kalak enda mereken diri guna nampati pelayanen Paulus ras la biar-biaren ngasamken kesahna. Kesah e kegeluhen. Kalak si nggit ngasamken kesahna guna sada dahin, ertina dahin e meherga kal man bana. Dahin erberita, dahin si arus ilakoken aminna uga gia kecibal geluh. Situasi politik paksa e sangana la aman janah pernah pe Paulus ibaba ngadap Gubernur guna iadili (Perbahanen Rasul 18:12-16). Tapi la e jadi alasen kalak enda surut bas erberita. Tupung kalak enda mulihken ku Roma, rumahna pe ipake guna ingan pulung, e maka enterem kalak si labo Jahudi make rumahna guna ingan kebaktin. Paksa si e rumah jadi ingan kebaktin banci ngerehken resiko ras ancamen si mberat. Kekristenen musuh negara. Kalak si mereken rumahna jadi ingan pulung, ia siap imusuhi negara. Jadi mereken rumah jadi sada pemere si meherga kal bas paksa si e. Erkiteken si e me maka Paulus ngataken bujur man kalak enda, ietehna perbahanenna e sada perjuangen si mberat. Kinipangen kalak enda mereken rumahna erkiteken ketetapen ukur bas erkiniteken man Tuhan Jesus.
Persila ras Akuila tetap mpertahanken kinitekenna ras ipakena tiap kesempaten guna erberita. Gia situasi kegeluhen erbahansa kalak enda arus Lawes bas sada ingan ku ingan sideban, la turah kebiarenna guna naksiken kinitekenna man Tuhan Jesus. Enggo jadi orat geluhna (gaya hidup) erberita, e maka i bas tantangen geluh tetap paguh kinitekenna.
Pengkenaina.
Bas ndalani wari-wari kita pe ngalaken erbage situasi si la bagi ukurta. Kita arus ndarat i bas zona nyamanta nari si erbahansa maun ndele kal ateta. Tapi kiniteken si paguh man Tuhan Jesus jadi ulu gegeh guna tetap nehken si ngena ateNa. Ngasup ngidah peluang i bas tantangen si mbelin, sabap enggo erlajar jadi pribadi si setia ras megenggeng gia melala persoalen reh ngupuh kita. Moria e me murid sejati si tetap mereken diri ngelai ras erberita aminna erbage-bage rungga jadi i bas geluhna.
Story Telling: Kisah Inspiratif Perempuan Kristen
Gelarna Merry Riana, itandai selaku sekalak motivator diberu si cukup terkenal, penulis buku ras melala jadi pembicara bas erbage ingan. Ndube ersura-sura nerusken pendidiken i Universitas Trisakti tapi erkiteken kerusuhan ’98 la seh sura-surana, emaka berkat ia ku Singapura Universitas Nanyang guna kuliah. I je me melala peristiwa jatuh bangun idalanina. Situasi ekonomi keluarga la bias e maka ia arus ndarami usaha guna nerusken perkuliahenna. Sempat piga-piga kali gagal ras minjam dana beasiswa ku pemerintah Singapura si arus igalari adi enggo lulus kuliah janah erdahin. Kecibal si bage erbahansa tambah megenggengna j bas ndalanken kerina usaha ras dahinna. Sada paksa, kenca enggo melala usaha ras dahin si idalanina lit ulihna, banci igalarina utang man pemerintah Singapura ras ngembangken usahana sideban. Kerna si e ia rusur ngerana uga campur tan Tuhan i bas kerina si idalankenna. Arah perdalanen geluhna megati ia naksiken maka labo bekas gegeh ras beluhna tapi perbahan keleng ate Tuhan saja si erbahan ia ngasup ndatken sura-surana.
Pengakun Merry enda, ku tuduhken keleng ateku man Tuhan alu makeken kerina talenta si ibereken Tuhan guna kiniulin man kalak si deban, ku endesken tole nari diringku ipake Tuhan ndalanken sura-suraNa.
Story telling Moria:
Moria nuri-nuri kerna perdalanen geluh ras keleng ate Tuhan si enggo inanamina.
