Teks : Job 32:1-9
Tema : Pentar melasken Ranan
Tujun : Gelah Mamre :
1) Meteh kuga cara Elihu kalak nguda ngerana man simetua.
2) Melasken ranan alu pentar man simetua.
1. KATA PENARUH
PA Mamrenta sendah berhubungen ras Hari Ulang tahun Saitun pe-9 ken. I bas wari ulang tahun Saitun enda Mamre iajak guna mehamat man Saitun alu cara mereken kehamaten man Saitun guna mpelebe ia ngerana mereken pedah tah ajar. Mamre ertanggungjabab nandangi Saitun gelah megegeh, mpeturah atena megedang, mpeturah semangat dingen mpegegehi kintekenna. Sabab arah cakap pe banci jadi tambar man orangtua Si enggo Saitun, sebalikna arah cakapta banci jadi penakit man bana. Emaka I bas Mamre erbelas perlu ukurken lebe maka belasken gelah Mamre jadi pasu-pasu man kalak sideban, terlebih lebih man kalak Si enggo lanjut usia.
Pentar melasken ranan berarti ranan e maba kemalemen ate, mpeturah damai, mpeteguhi kinteken, erbanca teman terapul ras megegeh, dingen mpeturah semangat ndalanken simehuli. Arah ranan si ibelasken kalak pentar banci mempengaruhi kalak simegisa guna ertutusna ndalanken singena ate Dibata, bagepe banci merubah sikap kalak Si ersalah gelah jera. Kebijaken Mamre ngerana man orangtua Si enggo lanjut usia mpeturah hubungen si mehuliantara kalak singuda ras kalak simetua. Nambari pusuh orangtua lanjut usia si memang sangana sensitif erkiteken faktor usia. Lit penggejapenna maka Iansia kurang iergaken. Tapi erkiteken lit Mamre si bijak emaka orangtua banci terhibur ras merasa iergai. Kerina e desken tambar si pepalemken penakit.
2. URAIAN TEKS
Megati kal manusia adi kune itendeng kiniseran simekelek, minter ikaitkenna ku bas dosa ras kesalahen, sebab minter iterjemahken kiniseran e erkiteken ukumen Dibata. Bagem sinialami Job. Penakit mekelek reh nendeng geluh Job janah mesui kal atena. Lit penggejapen Job maka Dibata kurang adil, sebab idarami Job pe ku pudi wari lalit akapna perbahanenna sisalah Si erbahanca reh ukumen Dibata sibage beratna. Job rukur sisada sabab la kal akapna adil perbahanen Dibata e. Nina, “Idarami Dibata alasen ngelawan aku janah bagi musuhNa ibahanNa aku nina Job” (Job 33:10).
I bas situasi ras kondisi sibage rupana, reh me teman Job sitergelar Elipas, Sopar , ras Bildat. Kalak enda atena ngapuli Job, tapi arah pengerana sitelu enda labo nampati Job gelah megegeh. Tapi kerehen temanna enda ngerana kerna kecibal Job janah nalahken Job. Nina sitelu kalak enda man Job, “Pasti kam erbahan silangena ate Dibata maka reh kiniseran sibage”.
Sijabapen Job ras teluna temanna. Tapi lalap la erkedungen pembahaesenna. Padahal teluna temanna enda enggo metua. Enggo mbue pengalamenna tapi la ngasup teluna temanna enda erbahanca Job megegeh arah rananna. Emaka erbelas me Elihu, singudana. Nina Elihu, “Aku nguda denga, tuan kam asa aku emaka mbiar aku melasken ukurku”. Arah ungkapen enda teridah uga Elihu ngasup ngergaken kalak si enggo metua. Tentuna arah pengalamen geluh kalak si enggo metua melala si banci iberekenna solusi guna ndungi masalah si ihadapi jop paksa Si e. Tapi nyatana la bage terjadi. Emaka nina Elihu umputenna, “Simereken kepentaren man manusia ngerana eme Kesah Dibata, labo perban tuana maka kalak jadi pentar”. Labo kepe erkiteken umurna enggo gedang maka itehna apai sibenar. Berarti Elihu enda ngakui kepentaren ngerana lit kaitenna ku bas Kesah Dibata erdahin simereken kepentaren man manusia.
Elihu ndube nari merincuh ngerana erkiteken megi penuri-nuri kalak si telu, tapi erkiteken ia nguda denga ibandingken ras kalak sitelu e, emaka ia nahan diri guna ngergai orangtua si lebih metua. Tapi Elihu merasa terpanggil ngerana man Job, sebab ia meresapi kai sinialami Job. Elihu labo ngasup nampati Job I bas kiniseran e, tapi sikurangna banci Job mengambil sikap sipayo ras benar ilebe lebe Dibata,kenca Elihu ngerana. Elihu nekanken maka kiniseran sebagai ukumen Dibata si dem keleng ate, guna mpekena-kena kalak siikelengina guna iselamatken (Job 33:30). Bagepe arah kiniseran banci erbahanca hubungen ras Tuhan erdeherna, Sabab iajarken Tuhan kap anakNa si ikelengina. Iajarken Tuhan manusia arah penakima alu namaken simesui ku bas dagingna (Job 33:19).
Elihu ngerana guna menyadarkan Job, maka labo lit manusia si la ersalah, kerina nge manusia ndabuh kubas dosa em sababna maka lit kiniseran. Tapi kiniseran e reh erkiteken lit sura-sura Dibata gelah ula meganjang ukur manusia (Job 33:17). Dibata erdahin guna kiniulin kalak Si ernalem man baNa, maka labo ipediat Dibata manusia ngadi I bas kiniseran, tapi Dibata mereken serpang pulah gelah mejuah-juah (Job 33:18).
Arah ranan siibelasken Elihu enda menyadarken Job ngakui dosana guna reh mpeteruk ukur ilebe-lebe Dibata. Bagepe arah penggembalaan siisehken Elihu, banci Job nggejapken ersemangatna nggeluh er Dibata. Sebab enggo iakui Job bahwa I bas Kiniseran pe Dibata erdahin guna kiniulin kalak sitek. Jumpa kiniseran lit sura sura Dibata, gelah ergegehna ngandalken Tuhan. Dungna Job denggo ngasup nerima keadaanna, erkiteken ia sangana iproses tah iuji kemurnianna er Dibata.
3. PENGKENAINA
Lit kuan-kuan ngatakenca maka, “lidah tidak bertulang”. Kai pe banci sibelasken. Ngerana la ka nggalar janah la perlu pake pulsa. Tapi perlu siinget maka ranan si enggo ibelasken lanai tertarik mulihi. Tenahken pe empat kuda nariksa lanai tertarik. Emaka sik-sik lebe maka tindes, ukurken lebe maka belasken.Gelah ranan si ibelasken kita ula ncedaken, tapi banci min ranan si ibelasken kita jadi pasu pasu man kalak sideban.
Ranan simaba pasu-pasu eme simpeturah ate kalak malem, simpeturah ate megedang, simpeturah perdamen, simaba berita simeriah guna keselamaten man singerana bagepe man simegiken kita ngerana. Kalak Kristen ngerana arusna lit bernuansa pastoral, mpegegehi, ngapuli ras nuduhken dalan sipayo guna keterkelinen. Ngerana man kalak Si enggo lanjut usia arus ncidahken sikap mehamat, labo pedas ngerana tapi manjar anjar gelah banci nyambung, pemegi Si enggo lanjut usia enggo ndauh kurang emaka ngerana megang pe banci erbahanca tersinggung.
Adi lit soal siman cakapenken pindo lebe man si enggo metua gelah ngerana ia nuriken isi pusuhna. Adi kune igejapken orangtua e ia iergai, jadi tambar man bana, Si erbahanca malem atena tambah umurna. Ula lit mamre ngerana mpekitik ukur orangtua si enggo lanjut usia, ula lit mamre mpersilahang orangtua lanjut usia, kai si banci si Iakoken guna kemalemen ate lanjut usia Iakokenlah.
Orangtua Si enggo lanjut usia mbue kal kiniseran inanamina, merasa kelungunen erkiteken enterem temanna lanai lit, simesuina pe tambah erkiteken faktor usia. Kerina fungsi ring-ringna reh mundurna, pemegi erkurangna, pengidah reh kaburna, penginget erkurangna, selera makan reh kendorna, nahe reh kurangna jingkatna. Kerina e ngkurangi kebahagianna nggeluh, i bas lanjut usia pikirenna pe sensitip, murah tersinggung. Tapi la tertutup kemungkinen banci atena megedang adi beluh kita mamre singuda ngerana ras ia, megah akapna adi beluh kita ncibalken ranan bana, dingen igejapna min ia iergai I bas geluh enda. Tentu enda me tugas Mamre nandangi simetua. Hindarken lah pengerana man orang,”kam ula nari ngeranai kai pe labo ietehndu”. Kita pe erdosa, orangtua enda pe lesek atena mpegendeki umurna si ibelasken kita e. Ngeranalah kita bagi Elihu ngerana man Job, ngapuli ras mpegegehi dingen mengubah cara berfikir Job ku simehuli.
4. Diskusi
1) Manusia secara normal teptep wari erbelas lit sepuluh ribu kata. Piga kata nge siibelas kita sibanci mpeturah ate kalak megedang, piga ka simpeturah ate kalak megendek? Kenca kita ngerana malem nge ateta tah lesek ateta ? Kai ateta silakoken i bas wari sireh enda? ( Bandingken ayat 8 — 9 )
2) Rikutken bahan PA ta enda kuga nge arusna pengerana Mamre i bas jabu, gereja ras masyarakat bagepe adat. Turiken ?
USULEN ENDE-ENDEN
1) KEE GBKP No. 57:1,2
2) KEE GBKP No. 249:1,3
3) KEE GBKP No. 182:1,2,3
4) KEE GBKP No. 188:1,2
5) KEE GBKP No. 198:1
