SI MAN OGEN : Masmur 71:17-18
TEMA : NURIKEN PERBAHANEN DIBATA SI MEJIN
TUJUN : Gelah Moria:
1) Nggargari perbahanen Dibata si mejin.
2) Jadi usihen encidahken perbahanen Dibata si mejin nandangi Saitun.
METODE PA : Diskusi ras aksi
Kata Penaruh.
Adi lit kesempatendu guna nuri-nuri kerna perdalanen geluh enda, kerna kai nge atendu si turikenndu? Banci jadi, piga-piga kita nuriken kerna perbeben nggeluh si la erkeri-kerin, sulitna ekonomi, perjuangen nekolahken anak ras njagai isi jabu. Banci jadi, lit ka piga-piga si nuriken kerna kesuksesen nggeluh, ntah usaha bage pe karir. Tentu, kerina turi-turin nggeluh enda banci ituriken. Tapi bicara terjeng je ngenca, kita ngerana kerna dirinta jine. Tempa-tempa kita ngenca si erdahin ras ngusahaken kerinana maka e jadi. Ogenta wari enda, e me belas-belas sekalak pemasmur si enggo metua, si milih guna nuriken kerna kuasa ras kinimbisan Dibata i bas geluhna.
Mpebagesi Pengangkan Kema Ogen.
Metua dingen ubanen, dua kata si lit i bas teksta enda nuduhkan situasi nggeluh pemasmur. Kata metua nuduhken umur si nggedang, pengalamen si mbue, bage pe cara rukur si mbages. Kata ubanen nuduhken buk si enggo mbentar. Duana kata enda, metua ras ubanen, ncidahken kegeluhen si enggo ngalaken erbage perdalanen dingen pengalamen nggeluh. Macem, pagit, ntebu, bage pe teriluh entah tawa, erbage rupa situasi nggeluh enggo inanami pemasmur. E maka arah ogenta Masmur 71:17-18 enda, teridah pengakun pemasmur kerna kegeluhenna si dem alu pengarak-pengarak Dibata. Benaken kin kitik-kitik nari Dibata si ngajari. Dingen seh asa metua dingen ubanen, pemasmur tetap nggejapken keleng ate ras perbahanen Dibata si mejin (luar biasa, mehuli). I bas cakap Indonesia, pemasmur ngakuken “perbuatan-Mu yang ajaib.” Perbahanen Dibata belinen asangken kebeluhen ras kengasupen manusia ngukuri si mehuli kerna kegeluhenna. Enda me sada cara rukur si mabai ketenengen. Bicara jumpa perbeben dingen percuban, pemasmur nulih ku pudi, nginget-inget kerina perbahanen ras penampat Dibata. Dibata enggo nampati tahun-tahun kegeluhenna, si ngalaken sada persoalen ku persoalen sideban si la erngadi-ngadi. Tapi Kuasa Dibata tergejap kal nampati benaken kitik-kitik nari seh asa metua dingen ubanen. Dibata tetap ngajari dingen mere kepentaren guna mentasi kerina. Cara rukur si bagenda, ngerehken pengarapen maka Dibata tetap erkuasa dingen nampati seh ku paksa-paksa seterusna. Jenari pemasmur ngumputi pengakunna alu sada pemindon man Dibata gelah i bas geluhna si enggo metua dingen ubanen Dibata tetap serta, nina “Ola kal aku tadingken.” Enda bentuk pemindon si jujur kal, sabap alu ertambahna umur nggeluh, enggo metua, maka gegeh i bas daging kula pe reh urakna. Ayat 18 enda dem alu aru ate kerna umur si enggo metua. Daging kula lanai bagi si gelgel, gegeh enggo erbaleng, pengidah ras pemegi reh urakna ras sidebanna. Kalimat “Ola kal aku tadingken” e me pemindon si reh arah pusuh nari. Megati i bas kegeluhen enda, lit pengakap maka kalak si enggo metua tempa lanai lit ertina, sabap lanai iakap erguna janah jadi beban. E maka itadingken dingen ilupaken piah nterem kalak si metua kelungunen i bas paksa metuana. I bas si e pemasmur maba kebiaren ras kearun atena man Dibata. I bas Dibata kerina meherga, amin pe enggo metua. Alu bage, pemasmur ngakuken maka alu penemani ras pengarak-ngarak Dibata, kalak si enggo metua dingen ubanen, tetap erguna dingen ngasup ersaksi kerna kuasa ras kinimbisan Dibata. Enda me sura-sura si mbelin i bas pemasmur. Umur si metua dingen ubanen labo jadi alangen guna nuriken keleng ate Dibata. Arah penemanj Dibata pemasmur ermomo, ersaksi nuri-nuri kerna kuasa ras kinimbisan Dibata man sinursur si nandangi reh. Sinursur e me si nerusken kegeluhen. Tujunna gelah sinursur pe ngantusi, nggejapken dingen ngasup ngakuken kinimbisan Dibata bas geluhna.
Pengkenaina.
“Older in years, strong in faith,” ertina umur meganjang, megegeh bas kinitekan, enda sada Slogan si tepat guna nuriken kerna kecibal orangtua si enggo bengket ku kategorial saitun. Orang tuanta saitun enggo mentasi mbue tahun, dingen reh warina reh tambahna kiniteken ras pengarapenna. Bagem totonta kerna kerina saitun GBKP. Alu bage, kecibal saitun i tengahtengah pelayanen GBKP nambahi semangat man sinursurna. Melala kal si banci ipelajari i bas saitun nari. Bagi si ikateken Job 12:12-13, nina: “I bas kalak si enggo metua lit kepentaren, tapi i bas Dibata lit kepentaren ras gegeh. Pengertin pe lit nge i bas kalak si enggo metua; tapi i bas Dibata lit pengertin ras gegeh guna ndalankensa.” Tepat kal pengakun pemasmur enda jadi pengakun orang tuata saitun, sabap i bas Dibata reh gegehna ia kerina. Janah kita pe reh ngasupna ngergaken saitunta sabap kepentaren, pengertin lit i bas saitun erkiteken Dibata si mereken gegeh man bana. Perbahanen Dibata si mbisa e enggo igejapken Saitun janah mbelin pengarapenta si e banci iturikenna nandangi kesusuren si nandangi reh. Bicara nulih kita ku pudi, semalna Saitun meriah kal niakapna nuri-nuri kerna kinata kegeluhen. Adi ndube turi-turin si ituriken Saitun e me erbage turiturin kegeluhen umpamana Kak Tangko Bunga ras debanna. Gundari ajuklah Saitun nuriken kerna Dibata, i bas Saitun nuri-nuri oratna kita mereken diri ras pusuhta guna megikensa, arah si e Saitun nggejapken ia merga ras erguna, kita pe ngalaken mbue pemeteh i bassa nari. Selamat hari jadi man saitun!
Aksi:
1) Amin kita lenga Saitun menurut umur, kuga nge kita ngidah ras nggejapken perbahanen Dibata i bas geluhta?
2) Cakapken bas PA Moria, kerna aksi si banci ilakoken guna mere semangat man saitun. Banci ka pe ngundang Saitun guna ikut PA Moria, janah mere kesempaten guna nuri-nuri kerna kiniulin Dibata i bas geluhna.
