SI MAN OGEN : Esekiel 13:17-21
TEMA : KUASA DIBATA ERDOLAT
TUJUN : Gelah Moria:
- Nggargari perbahanen-perbahanen si ciga ate Dibata.
- Mbiasaken nggeluh i teruh. Kuasa Dibata.
METODE\PA : Kesaksian
Kata Penaruh.
Okultisme ertina tek man kuasa-kuasa gelap. Kuasa e iakap si banci mereken gegeh ras serpang pulah man manusia, i bas kerina dampar geluhna si labo rehna i bas Dibata nari. Kuasa gelap e terbuni, la kerina kalak banci ngidahsa ras nurikensa. Engkai maka lit denga kalak si teriket ku bas praktek okultisme? Banci saja lit sura-surana, umpamana gelah pedas bayak, gelah pedas naik pangkat, gelah pedas sehat, gelah dat teman nggeluh, gelah kulana kebal. Tapi lit ka erkiteken mbiar, lit akapna rusur si ngganggu i bas geluhna si erbahansa ia la teneng. Ingan kuasa gelap e banci i bas benda-benda/jimat, binatang, batang kayu, kuburen manusia ras sidebanna. Ingan-ingan e niakap lit kuasana si banci mereken gegeh ras serpang pulah i bas ngalaken perbebenna. Mari si perdiateken praktek okultisme si lit i bas ogenta enda.
Mpebagesi Pengangkan Kerna Ogen.
Manusia si ermasap-masap, e me pendilo Tuhan man nabi Esekiel. Isuruh Tuhan nabi enda mperdieteken nabi-nabi diberu si perguak si erdahin i tengah-tengah bangsa Israel. Paksa e lagu langkah bangsa Israel encedai pusuh Dibata janah sura-suraNa kin pe ngukum bangsa enda. lidah Dibata maka lit nabi palsu si diberu si ersura-sura nebu-nebu bangsa Israel si diberu. I bas ia nebu-nebu e ipakena alat/barang-barang si ipake diberu. Ipakena jimat ku bas pergelangen tan bage pe makeken tudung/kerudung man diberu-diberu si ndahi ia. Tudung i bas budaya timur e simbol kemakmuren ras kemenangen. Tudung e ibahanna mejile alu namai perhiasenna, sikap man tatapen. Jimat i bas pergelangen tanna e nuduhken geluh la kekurangen (makmur). Nabi perguak e, nami-nami diberu-diberu Israel gelah make tudung si enggo tama perhiasenna. Ikatakenna, adi pake tudung e kerina ia mejile ras mehaga. Ertina, labo ia pagi ndekah rate gulut, amin pe pagi kena ukumen. Nabi perguak e rusaha gelah diberu diberu Israel tek man katana. Dungna, kalak Israel tetap erbahan si jahat, lanai bo piga si tutus er-Dibata. Kenca nabi perguak e erbelas, dat upah ka ia i bas kalak Israel e nari, e maka la erngadi-ngadi ia nuriken kata guak si tempa mehuli’ man beginken. Kai si ikataken nabi perguak e tuhu-tuhu petembil ras kai si ikataken nabi Dibata. Situhuna, bage ibahanna guna kepentingenna jine, lako ndatken piga ngkrauk gandum ras piga-piga ncepik roti.
Nabi Dibata jine nuriken maka adi bangsa e la ngendesken dirina man kalak Babel, maka kerina dilaki kalak Israel e ikernepken ras diberu-diberu Israel ipenusur erga dirina, lanai jadi kalak si mehaga. Adi sedekah enda ingan kundulna i bas ingan si mehaga, ipaksa me pagi kundul i taneh, bukna iserbuti, nuduhken kecedan ate erkiteken la iergakenna dirina jine. Enda gambaren kalak si iperbudak. Nabi Dibata e ngatakensa bangsa enda pagi ibuang ras ngenanami si mesui kurang lebih 70 tahun. E labo waktu si kentisik.
E maka isuruhNa Nabi Esekiel ernubuat kerna kecibal nabi perguak e.”Cilaka me kam o diberu-diberu tukang nubuat!” Ku sintapken me tudung penangkalndu janah ku bere bangsaKu pulah i bas kuasandu nari seh rasa lalap. Kenca bage itehndu maka aku kap Tuhan. Labo ate Dibata senang adi bangsaNa reh dauhna nadingken IA. E maka di kune lit kalak si mabai bangsaNa ku dalin si papak segat kal ateNa. Nabi diberu si perguak e la banci lang mela akapna sabap irigat-rigatken Dibata tudung si rusur ipakena nebu-nebu bangsaNa, isintapkenNa jimat si lit i bas pergelangen tanna. Ibebasken Dibata me pagi bangsaNa i bas kuasa nabi diberu si perguak e. Labo ngasup nabi perguak e ngelawan Kuasa Dibata. Kerina jimat ras pemetehna kernep nge pagi. Labo lit kuasa si deban si ngasup njului Kuasa Dibata e. Mate geluh manusia pe kerina lit i bas kuasaNa.
Pengkenaina.
Labo kepe nai ngenca lit praktek okultisme, seh asa genduari lit denga kalak si makesa, umpamana; diberu si sangana natang tuah ibaba-babana gunting, leketkenna bas bas bajuna, namaken lasuna tonggal i bas dompet gelah ula bene senna, nama jerango i bas bura anak-anak, erbahan lapik ras mereken besi mersik man anak perana si atena lawes erlajang. Lit ka si make susuk, gelah teridah tetap nguda, make pelaris ras erbahan pajuhpajuhen gelah lancar usaha. Lit denga ka kalak si tek man roh nini tudung si enggo mate banci maba tuah entah si la mehuli adi la mehamat man bana. E maka ikuburen rusur ibereken cimpa matah, belo, isap, mumbang ras sidebanna encidahken kehamaten. Anak singuda genduari tek denga nandangi ramalen bintang (horoskop), ngenen garis tan, main jelangkung seh banci kerina kesurupen.
Kerina si make kuasa gelap situhuna erkiteken la .tandaina alu payo Dibata si erdolat nandangi kegeluhenna. Si make kuasa gelap e biasana mekisat ertoto, la tek nandangi Kata Dibata, e maka la ia biar-biaren nulak KataNa. Murah depresi, merawa ras rubat i bas jabu. Kerina perbahanen si bage ciga ate Dibata. Janah kalak si bage, labo banci dat bagin i bas kinirajan Dibata adi la ia mulih ku Dibata. Kuasa Dibata belinen asangken kerina kuasa si lit i babo doni enda. Man bana saja kita ernalem. Biasakenlah teptep wari erpengendes man baNa. Sialoken me kedamen si tuhu-tuhu.
Kesaksian:
- Moria 2 seh 3 kalak nuriken kesaksinna pernah iajuk kalak gelah make kuasa gelap. Adi ikutkenndu uga ulihna, adi la ikutkenndu kai alasenna?
- Dibata erdolat (erkuasa, keputusenNa si jadi) i bas geluhta. Uga dage sikapta ku lebe wari enda?
