SERAYAN SI NGASUP NGATURKEN DAHIN DIBATA
Titus 1:5-9
A. PERSIKAPEN
B. PERPULUNGEN JABU-JABU
- RENDE: KEE No. 297:1 “Man Bandu Raja G’reja”
- ERTOTO (IBABAI SI MADA JABU)
- NGOGE KATA DIBATA : Titus 1:5-9 (logeken Anak)
- RENUNGAN
Tema : Serayan Si Ngasup Ngaturken Dahin Dibata
Pustaka si Badia naksiken maka erbage-bage cara si ipake Dibata lako milih sekalak jelma jadi serayanNa. Lit si ipilih i bas kegeluhen si mesera dingen dem tantangen geluh, lit ka si ipilih Dibata i bas kegeluhen si mehuli nari. Cara-cara sinipakeken Dibata e tentu labo banci i intervensi manusia rikutken sura-suraNa. Tentu tetap nge ije ipebelin sura-sura Dibata si erdahin. Manusia terjeng alat si ipakeken Dibata lako nehken sura-suraNa man doni enda. Tentu alu lit sada tanggung jabab si la banci lang arus ilakoken manusia. Tanggung jabab e idalanken alu dem kiniteken seh maka ulih pendilo Dibata e maba kiniulin man doni enda. Sabab kerina si jadi e erpalasken sura-sura Dibata kap. Bagem pendilo Dibata kempak kalak si erkiniteken.
Guna tujun si e me Paulus mpersingeti Titus tupung ia ngelai i Pulau Kreta. Titus, sekalak si labo kesusuren Jahudi ipilih Paulus lako nampati ia meritaken Berita Si Meriah. Janah secara khusus dahinna ibereken Paulus ngarak-ngarak perpulungen i Pulau Kreta. Perkembangen kiniteken i Pulau Kreta labo erdalan alu mehuli bagi i bas piga-piga ingan si deban, umpamana i Epesus. Perkembangen perpulungen i bas ingan e cukup lambat. Sie teridah arah pesan si isehken Paulus man Titus, e me kap: mpejore dahin si perlu idungi bage pe ngangkat pertua-pertua (bdk. Tit. 1:5). Adi i bas ingan si deban lanai terjeng Pertua ngenca si man pilihen, tapi ikut pe Diaken. Khusus i Kreta, Paulus nuruh Titus gelahna milih Pertua-pertua si jadi temanna ngelai. Bagem nuduhkenca kuga lambatna perkembangen perpulungen e.
Kalak si ipilih e tentu labo banci kalak si la tutus erkiniteken. E maka i bas suratna enda teridah nge alu tangkas ituriken Paulus kuga kegeluhen kalak si ipilih jadi serayan Tuhan. Lit piga-piga biak si itekanken Paulus, e me kap:
a. Jabuna arus erkemalangen man Dibata
Prinsip sie teridah i bas penegasen Paulus maka sekalak serayan arus nge sekalak ngenca ndeharana, janah anakanakNa erkiniteken man Kristus (bdk. Tit. 1:6). Ertina maka Paulus negasken kegeluhen sekalak serayan e la terlepas i bas kiningasupenna ngaturken kegeluhen jabuna. Biak si mehuli arus nge jadi cerminen kegeluhen jabu kalak Kristen. Gelahna arah jabu kalak si erkiniteken e kalak si deban pe ertedeh ate nandai Dibata.
b. Biak Pemimpin si Erkiniteken
La terjeng kegeluhen jabuna, si terpenting si idah Paulus e me kap kegeluhen pertendin serayan e. Arus isedarina maka ia sekalak pemimpin i bas kiniteken. E maka la banci lang biak-biak kalak si erkiniteken pe arus turah i bas dirina, umpamana: la meganjang ukur, la mesukah merawa, la merangap ras si debanna. Sekalak pemimpin kiniteken arus ngasup nuduhken biak kiniteken i bas geluhna.
c. Encikep Nteguh Kata Dibata
La terjeng biak serayan e arus biak kalak si mehuli si itekanken Paulus. Si paling penting menurut Paulus e me kiningasupen serayan e nggeluh rikutken sura-sura Dibata. E maka la banci lang arus icikepna Kata Dibata e alu nteguh. Sabab Kata Dibata e kap si mabai ia nggeluh sentudu ras sura-sura Dibata. Kata Dibata ka nge si mpengasup serayan lako mpegegehi kiniteken kalak si deban. Seh maka tetap pe kinitekenna man Dibata.
Adina sekalak serayan ngasup ndalanken biak si bage i bas kegeluhenna, tentu reh ngasupna ka pe ndahiken dahin siniampeken Dibata man bana. Lanai ia erdahin erpalasken gegehna jine, tapi idahikenna kerina erpalasken gegeh ras kengasupen sinibereken Dibata man bana. Kegeluhen serayan si bage, tentuna encidahken nilai-nilai kinibujuren si isuraken Dibata i bas manusia. Alu bage, arah kerina pendahin serayan e terpuji me kap gelar Dibata. SOLI DEO GLORIA.
5. NURIKEN PENGGEJAPEN
– BAPA
– NANDE
– ANAK
6. IRAKUT PERTUA/DIAKEN/EMERITUS/PENDETA
7. DISKUSI
a. Oge mulihi Titus 1:6-9. Guna mengevaluasi dirinta, biak siapai nge si megati menghambat kita i bas ngelai?
b. Turikenlah upaya-upaya si banci silakoken i bas nampati serayanta i bas kekurangenna ngepkep kita perpulungen.
8. NEHKEN PERSEMBAHEN
9. RENDE:171:1,2 “Gelar Tuhan Jesus Kristus”
10. Pertoton Sapaat itutup alu Pertoton Tuhan
– Gelah serayan Tuhan tetap nggeluh i bas kinibujuren.
– Gelah perpulungen tetap numpak-numpak serayan Tuhan.
– Kerna pemilihen serayan Tuhan gelah erdalan alu mehuli.
– Kerna jabu kundulen ras si turah i bas perpulungen.
– Pertoton Tuhan.
C. JEDA RAS PENUTUP
Momo
