SADA ARON NDAHIKEN DAHIN DIBATA
1 Korinti 3 : 5-9a
( Visi GBKP )
A. PERSIKAPEN
B. PERPULUNGEN JABU-JABU
- RENDE KEE No. 217 : 1
Meriahlah ukurta mujikenca
Dibata Raja Mbelin si mulia
Peb’linken min gelarNa si Badia
Ban IA ngerajaisa sinasana
Reff : Maka bujur nge Dibata man pujin
Nai-nai nari genduari seh pagin
Ban tandaiNa kita k’rina si suin
Sembah IA me madin - ERTOTO (Bapa/Nande)
- Ngoge Kata Dibata (iogeken sekalak anak )
Teks : 1 Korinti 3 : 5-9a
Tema : Sada Aron Ndahiken Dahin Dibata
Aron adalah sebuah konsep pola kerjasama dan tolong menolong pada masyarakat suku karo di Sumatra Utara, baik dalam menghadapi ancaman dari pihak Iain atau dalam mengerjakan sesuatu (sumber : https : //p2kstekom.ac.id> Aron). Ndube, aron mereken gegehna sapih-sapih ia si sada aron lako erdahin i jumana alu pegancih-gancih. Aron ndahiken dahin gelah pedas ras mbelang bekas ndungi dahin nuan-nuan, rani, rsd. I bas sada aron, la seri kerina gegeh ras kengasupenna. Lit si megegeh naka-naka baluren jong, lit si meter nuan, lit si meter muat lacina, rsd. Gelarna pe sada aron maka kerina muat bagin ndahiken dahin, si sampatsampaten e maka dahin pe banci pedas dung.
Kata “Aron” i baba ku bas konteks pelayanen gereja ertina nggit muat bagin ndahiken dahin pelayanen, nggit situmpak-tumpaken ras sisampat-sampaten. Bagi si ituriken Paulus man perpulungen i Korinti, maka dirina jine (Paulus) ras Apolos e me pelayan Dibata si negu-negu perpulungen gelah erkiniteken. Ndahiken dahin Tuhan rikutken pemere si ibereken Tuhan man bana. Paulus nuankenca, Apolos niramsa tapi Dibata si erbahanca turah. Alu kata si deban Apolos ras Paulus e me si ndahiken dahin Dibata (tim kerja Dibata/ Aron Dibata). Apolos ras Paulus sada aron ndahiken dahin, si mada dahin e me Dibata. Apolos ras Paulus makeken pemeteh, gegeh ras kengasupenna rikutken pemere si ibere Dibata man bana. Paulus nuankenca ertina ia si menaisa erBerita Si Meriah i Korinti. Apolos niramsa ertina ia si neruskenca (ngelai) perpulungen Korinti. Subuk si menakenca ras si neruskenca duana muat bagin ngelai perpulungen i Korinti.
Sinuanca ras si niramsa labo penting, tapi si pentingna e me Dibata, sabap IA nge si peturahsa. Kata enda pertenget man si muat bagin i bas pelayanen gelah la ndabuh ku bas biak meganjang ukur ras biak ncidah-ncidahken dirina/ ngaruhna. Aron Dibata arus tetap meteruk ukur dingen nggejapken Dibata si mada dahin ras Dibata nge si mereken pemere-pemere lako banci ipakeken muat bagin ndahiken dahin er-Berita Si Meriah.
Selaku aron Dibata ikataken Paulus maka man si nuansa ras si niramsa ibereken Dibata me upahna rikutken pendahinna sekalak-sekalak. Ibereken Dibata upahna ngertiken maka i bas ndahiken dahin Dibata ula ngarapken upah arah manusia nari subuk pujin, kehamaten, kehagan,pemere/pengalon. Aron Dibata tetap ndahiken dahin Dibata gia lit si senang ntah la senang, tetap ndahiken dahin Dibata sabap Dibata nge si mada dahin. Erkiteken Dibata si mereken upah kai pe si idahiken sekalak aron Dibata lit ulihna, gunana, la lit si sea-sea.
Arah Visi GBKP: “GBKP menjadi kawan sekerja Allah untuk menyatakan rahmat Allah kepada dunia” (GBKP aron Dibata guna jadi pasu-pasu man isi doni enda) (1 Kor. 3:9, dan 1 Pet. 2 : 9-10 ) njemba kita kerina gelah tetap muat bagin ndahiken dahin Dibata, tetap ermeriah ukur, la si panjang punjuten tapi si iah-iahen. Kalak si tek man Jesus Kristus subuk selaku ngawan perpulungen, Pertua, Diaken, Emeritus, Pengurus, Pendeta, tetap nggejabken maka dirina e me aron Dibata si ndahiken dahin Dibata. Nggit muat bagin rikutken pemere si ibereken Dibata man banta sekalaksekalak, gia pelain-lain pemeteh, gegeh ras kengasupen tetap ngelai Tuhan. Dibata enggo leben mereken pemere-pemere man banta, si pakekenlah guna kemulian gelarNa. Nintalah: “Ikut aku sada ndahiken dahin Dibata, ikut aku sada jadi aron Dibata”.
4. Nuriken Penggejapen
- Bapa
- Nande
- Anak
5. Diskusi/Sharing
1) Kai erti tema “Sada Aron Ndahiken Dahin Dibata”?
2) Turiken pengalamenta i bas muat bagin ndahiken dahin Dibata?
6. Irakut Pertua/Diaken/Emeritus/Pendeta
7. Momo
8. Rende KEE No. 302 : 1,2 (Persembahen)
Nginget perkuah Dibata si mbelin
Si isehkenNa man banta k’rina kin
I bas kerina dampar kegeluhen
I doni si dem alu keguluten
Reff : Endeskenlah kulanta man Dibata
Kerinana si lit i bas geluhta
Selaku persembahenta si nggeluh
Em persembahen si ngena ateNa
Sabap bage me arusna kita kin,
Ersembah man Dibatanta si mejin
Si nggo m’reken man banta manusia
Keg’luhen si mehuli ras badia Reff: …
9. Pertoton Sapaat (ibabai serayan Tuhan)
- Gelah kerina ngawan perpulungen bage pe serayan nggejabken maka ia aron Dibata dingen muat bagin ndahiken dahin Dibata alu pemere-pemere si lit bas ia.
- Gelah kerina ermeriah ukur ngaloken ras ndahiken dahin Dibata sabap Dibata nge si mereken upah
- Si turah bas perpulungen
10. Rende : KEE No. 329 : 1, 2
Tuhan Jesus penampatku, IA penalemenku
Kuikutken me dalanNdu, Kam me kegeluhenku
Reff: Teneng tetap tendingku, paguh kinitekenku
Lanai lit kebiarenku, tan Tuhan ku me negu
Tuhan Jesus penampatku, Kam me kapen gegehku
LayasiNdu kap ukurku, la teralang uliNdu Reff: …
11. Pertoton Tuhan (ibabai Serayan Tuhan)
JEDA RAS PENUTUP
