SERAYAN SI MEHULI, BUJUR DINGEN LA SALAH
1 Tesalonika 2:8-12
A. PERSIKAPEN
B. PERPULUNGEN JABU-JABU
RENDE LAGU KAKR (ibabai Anak)
Kita kerja sama-sama, sama-sama buat Tuhan
Kita kerja sama-sama senanglah hati
Kerjaku kerjamu semuanya buat Tuhan
Kita kerja sama-sama senanglah hati
ERTOTO (Ibabai Nande)
RENDE KEE NO. 59 (Ibabai Bapa)
Keleng ateNdu tangkas bangku si kupujiken lalap min
NGOGE : 1 TESALONIKA 2:8-12 (Ibabai Saitun)
Tema : SERAYAN SI MEHULI, BUJUR DINGEN LA SALAH
I bas paksa-paksa persikapen pemilihen serayan (Pertua ras Diaken) i bas gerejanta, la sitik arapen i bas pusuh perpulungen bage pe gerejanta GBKP secara sinodal, gelah kerina serayan si terpilih i bas periode 2024-2029 enda jadi sada aron (tim) si ngelai, mabai, mimpin GBKP enda ku lebe reh ulina. Serayan si terpilih e pe kari iarapken ngasup negu kerina warga GBKP ndatken ras ngenanami kesejahteran secara pertendin (spiritual).
Erbage-bage karakter/biak si lit i bas calon-calon serayan enda. Si pasti, kerina ngawan perpulungen notoken biak serayan si jadi orangtua (bapa ras nande) singkelengi, si mabai ras njamin kegeluhen anak-anakna alu mehuli. Serayan e me sekalak suruh-suruhen si ndahiken dahindahin si isuruh tuanna alu tutus ras ertanggungjabab. Tugasna mastiken kai si isuruh e erdalan alu mehuli dingen ernanam ras erguna.
Bage me Paulus nuriken kai si enggo ilakokenna i tengah-tengah perpulungen Tesalonika. Labo atena ndarami ntah ngayaki keuntungen man dirina, subuk materil ntah pujin i bas manusia nari. Tapi, si enda iturikenna guna mereken energi positif, motivasi, semangat ras usihen man perpulungen e kerna kegeluhen sekalak serayan. Kerina si enggo ilakokenna e me guna kiniulin bage pe kemajun perpulungen. Palasna tentu keleng ate. Kekelengen si enggo ialokenna mahan bana meriah akapna nehken keleng ate Dibata e arah Berita Si Meriah. Keleng ate e erbahanca lalap la erlatih-latih, erdahin suari berngi gelah menahang iakap perpulungen ngalo-ngalo ia selaku serayan. Paulus mejingkat, pekerja keras, kreatif, mbangun kerjasama, meteruk ukur dingen ngasup ngergai kalak si deban.
Selaku serayan, la bias kepe terjeng pentar, mejingkat, semangat, isenangi kalak si deban, nterem temanna ras ngasup mbangun komunikasi ras kalak si deban. Tapi pe arus nggeluh alu ngasuhi bage pe njagai biak si mehuli, bujur ras la ersalah. Kata enda labo ngataken maka manusia labo la erdosa tapi dosa e enggo itebus Jesus janah alu keselamaten si enggo ibereken Kristus man kalak si tek arus irespon dingen igeluhken alu lagu langkah si benar.
- Mehuli e me biak Dibata si lit i bas manusia. ‘Allah itu baik’ la erndobahen, la erpilihen keleng ateNa. Nggeluh mehuli, ngasup mereken pelayanen man kerina manusia khususna perpulungen, jadi usihen, la rayo-ayo.
- Nggeluh bujur, benar ras adil, rembang tengah rukur termasuk erbahan keputusen, la saja i adepen manusia tapi pe i lebe-lebe Dibata. Tutus ersembah bage pe ncidahken ketutusenna e i bas geluhna.
- Nggeluh la ersalah/la cacat, nimbak dosa dingen ngasup njagai dirina rikut ras rarasen si ibereken guna ikepkepna (Perb. 20:28). Alu bage la lit dalanna kalak si deban ncurnaken gelar Dibata erkiteken pirasatta si la mehuli. Alu biak enda, mehamat ras iergai kalak ia, janah la lit dalanna curna gelar Dibata arah lagu langkahna e.
Alu biak si bage banci ia ncidahken dirina selaku orang tua man perpulungen. Gambaren Paulus selaku orang tua, adi i bas ayat 7 iturikenna desken nande. I bas ayat 11 iturikenna desken sekalak bapa. Ertina tanggungjababna la saja mpekena-kena kegeluhen perpulungen tapi pe ngelatih ia: mpersingeti dikune lepak, ngapuli i bas erbage kearun ate erkiteken doni enda ras kerina persoalenna bage pe mpegegehi perpulungen e. Kedungenna kerina perpulungen si jadi alamat Berita Si Meriah e banci ngenanami kinirajan Dibata (genduari ras masa si reh).
Bagenda me arapenta nandangi kerina serayan Dibata i bas ‘rumahta’ GBKP enda. Mari kerina calon pertua ras diaken sipebelin ras siasuhi min biak-biak enda, alu melatih kegeluhen pertendinta. Nikapken ras njadiken dirinta selaku serayan si mehuli, bujur ras la erpandangen alu tetap nggeluh ngusih Tuhanta. Bage pe ngawan perpulungen si dukung calon serayanta alu pertotonta gelah ngasup njagai lagu langkah si ngena ateta terlebih-lebih ate Dibata si mada gereja.
DISKUSI
- Asa bancina kerina calon pertua ras diaken nuriken pengalamen (ngerefleksiken) tema enda arah geluhna sedekah enda. Dingen nuriken tekadna ku lebe wari enda.
- Ngawan perpulungen nuriken pengalamenna rikut dukungenna man kerina calon Pertua ras Diaken alu nggit notoken dingen milih sue ras sura-sura Dibata.
PERSEMBAHEN RENDE KEE No. 450:1,4
Endesken kami man baNdu sada bagin pemereNdu
PERTOTON SAPAAT
- Kata Dibata si enggo ialoken nggeluh min i bas pusuh perpulungen
- Perpulungen nikapken diri guna ndalanken (ikut muat bagin i bas pemilihen) sinisuraken Dibata
- Calon pertua ras diaken nikapken diri ikut i bas pemilihen ras ersikap dikune terpilih ras la terpilih
- Jabu ingan pulung sendah ras ingan pulung minggu si reh
- Siturah i bas perpulungen
RENDE KEE No. 350:1,2
Kelengi kebenaren pedauhlah si jahat
PERTOTON TUHAN
Momo
