Sl MAN OGEN : Matius 18:10; 3 Johanes 1:14
TEMA : NGERGAKEN ANAK
TUJUN : Gelah Moria:
- Nuriken palas ras ulih ngergaken anak-anak.
- Mpepulung perbahanen si ngergaken anak.
METODE PA : Sharing
Kata Penaruh.
Anak e me sekalak dilaki entah diberu si lenga mbelin (dewasa) entah pe lenga ndalani pubertas. Adi Undang-undang Republik Indonesia No. 23 Tahun 2002 kerna Perlindungan Anak, ningetken maka anak e me sekalak si lenga umurna 18 tahun, termasuk si i bas bertin denga. Pendapat enda pe sue ras pandangen UNICEF si mereken batasen usia anak e me 0 seh 18 tahun. I bas Keputusen Presiden RI No. 36 tahun 1990 kerna hak anak, isingetken maka anak pe lit hak dasarna selaku manusia. Amin gia bage tetap denga perlu iperdiateken secara kusus sabap kebutuhen anak beda denga kal ras kalak dewasa.
Perlu si eteh maka anak pe situhuna pribadi istimewa si teptep bagin badanna ijadiken Dibata, si ibentuk Dibata i bas bertin nandena nari (bdk. Mas 139: 13), e maka anak pe pribadi si unik ras meherga. Geluh manusia meherga iadepen Tuhan. Termasuk i je geluh kalak dewasa bage pe geluh anak-anak.
Mpebagesi Pengangkan Kema Ogen.
Matius 18:10, masuk ku bas perikop “Perumpaman kerna biri-biri si bene” (ay. 10-14) si ngerana kerna kiniulin Dibata guna maba perpulungen si bene gelah bengket mulihi ku Kinirajan Surga. Isi perumpaman e me kerna Kinirajan Surga. Lit penyesat si la banci bengket ku je janah lit si bene banci terdat guna bengket ku je. Lit penungkunen ajar-ajar Jesus i bas Matius 18: 1, ise si mbelinna i bas Kinirajan Surga? I bas njabap penungkunen enda idilo Jesus sekalak danak-danak. IturikenNa maka adi ate bengket ku bas Kinirajan Surga maka arus tuhu-tuhu robah dingen bali ras danak-danak (ay. 3); janah si mbelinna i bas Kinjrajan Surga e me kalak si mpeteruk bana bali ras danak-danak (ay. 4); ise si ngaloken danak-danak i bas gelarKu, ialokenna kap Aku (ay. 5). Jesus ngangkatken kerna danak-danak erkiteken biak danak-danak si polos, sederhana janah tulus.
I bas ayat 10, ngerana kerna danak-danak si menukah denga kal ngajarisa. Banci iajari ku si jahat bage pe iajari ku si bujur. Adi danak-danak iajari ku si jahat tentu enggo lit i je kesengajan (irencanaken). Janah kalak si bage me si ikataken Jesus gelah iukum alu ngiket kerahungna jenari igedapken ku bas lawit (ay. 6). Bage me beratna ukumen man kalak si atena mabai danak-danak ku si jahat. Man Jesus danak-danak e me si man usihen i bas ketulusen ras bersih perukuren. Teridah arah kininggiten guna ngaloken kalak sideban alu la ersarat (suku, agama, keduduken la penting man danak-danak, kerina banci jadi temanna main-main); pedas malem pusuhna (mengampuni ras ngelupaken salah kalak man bana); tek man perkatan kalak mbelin, la arus ibuktiken (bdk. Heb 11:1) janah biak si bagenda me perlu iergai dingen ihamati bage pe ilindungi. Danak-danak me warga kerajaan.
Surat 3 Johanes 1:4, encidahken kerna kegeluhen erkiniteken kalak Kristen si arus tergejap man si enterem. Salah sada sosok si bage e me Gayus (ay. 1,3). Keriahen ukur orang tua adi anak-anak nggeluh i bas kebenaren ertina lit kiniteken si aktif labo terjeng teori kerna aturen ras Iarangen tapi payo kin ilakoken/idalanken. Lit tantangen i bas ndalanken si ngena ate Dibata amin gia bage tetaplah dalanken kebenaren ras kebujuren. Penggejapen orang tua si enggo ngajarken anak-anakna i bas kebenaren Kata Dibata lit kebanggan ras keriahen ukur sabap anakna jadi pribadi si ngelakoken Kata Dibata. Enda me keriahen dingen kesangapen si tuhu-tuhu. Anak gambaren orangtua, anak si nggeluh i bas kebenaren. Kebujuren e me mbelin ipengaruhi ku bas pengajaren orangtua. Enda me ulih ngergaken anak. Si jadi keriahen labo terjeng ulih siidatkenna i bas doni tapi pe i bas ngasup ndalanken Kata Dibata.
Pengkenaina.
Anak e me kertas si enggo lit tulisen ras warnana. I bas orang tua ngajarken Kata Dibata, iarapken anak reh ngasupna nandai dirina, selaku pemere Dibata. I bas ia lit kengasupen erbahan si mehuli. Jadi tuduhkenlah perbahanen ras sikapta si mehuli man bana. Perbahanenta man anak jadi gambaren perbahanenta man Dibata. Orang tua me si perlebena ngergaken anak i bas jabu alu mereken kesempaten ras tanggungjabap gelah anak bana muat bagin mpekena-kena jabu. Arah si e pe ia banci erlajar kerna tanggungjabap misalna iendesken bana dahin sederhana guna ilakoken alu rutin. Pengergan nandangi anak banci pe ilakoken alu megiken rananna. likutken ia i bas runggu keluarga bage pe isungkun ia kerna sura-surana, la banci orangtua mutuskenca si sada. Arus jbuka percakapen ras anak. La lit anak si motu/bodoh/gutul/jahat tapi si lit anak si kurang ndatken bimbingen, pengajaren ras pengergan. I bas HUT KAKR si pe-134-ken, iarapken Moria ngergaken anak i bas kecibalna si perlu dukungen arah kalak dewasa i sekelewetna. Moria (Nande) me jadi support system si positif i bas kembang anak-anak KAKR’.
Sharing:
Ibahan kelompok kitik (3-5 kalak) entah pe kelompok mbelin (6-15 kalak). I bas kelompok ibere kesempaten man Moria guna mere pendapat kerna penungkunen:
a) Turiken pengalamenndu selaku anak: pengajaren orangtua si tetap jingetndu asa genduarj si sitik buena lit ngaruhna ku bas geluhndu selaku kalak si enggo dewasa gundari.
b) Kai atendu siniajarkenndu man anak i tengah jabu gundari?
c) Uga sura-surandu nandangi anak i bas jabundu (pendidikenna, pendahinna, teman geluhna) enggo nge sue ras sura-sura anak.
d) Kai si enggo ibahanndu guna njadiken anak i bas jabu nandai diri alu payo. (Adi banci ibahan jadi aksi bersama nandangi KAKR Runggunta/ sektorta).
