Bahan PJJ GBKP 7-13 April 2024

TETAP ERDALAN I BAS DALAN SI PINTER
Heber 12:12-15
(Menegakkan Keadilan, Perdamaian)

A. PERSIKAPEN
B. PERPULUNGEN JABU-JABU
Rende: KEE No. 181:1 (ibabai simada jabu/ Nande)
Segedang-gedang geluhku, itemani Penebus
Labo …………..

Ertoto (Ibabai simada jabu/ Nande)

Renungen
Teks : Heber 12:12-15 (logeken pengurus PJJ)
Tema : Tetap Erdalan I Bas Dalan Si Pinter

Kegeluhenta terbagi i bas telu masa: masa lalu, masa kini dan masa depan. Desken sada perdalanen, lit si enggo ibentasi, lit sipaksa sibentasi ras lit si nandangi sibentasi. Ija kita gundari tergantung kal ku bas dalan si enggo sibentasi, ras kuja kita pagi tergantung ka ku bas dalan siapai si pilih kita genduari. Tema PJJnta wari enda: “Tetap erdalan i bas dalan si pinter”. Tema enda mabai kita tetap erdalan i bas dalan si enggo isikapken Dibata man banta, amin kai gia sekali si man bentasenta.

Kitab Heber e me sada surat si itujuken man terpuk kalak Kristen si sangana ngenanami kiniseran si mesangat kal i bas ia ndalani ras mpertahanken kinitekenna. Surat enda tujunna mpegegehi kiniteken kalak si ngalokenca i bas ngalaken kiniseranna alu tetap natap kempak Jesus. Secara khusus i bas pasal 12 ituriken kerna kiniseran si nanami kalak si tek e me sebage tanda kita anak-anak Dibata, janah kiniseran e jadi pendidiken iman si tujunna guna kiniulinta, gelah kita dat bagin i bas kebadianNa. Aminna pe asum kita iajarken, ceda ateta, la siakap meriah. Tapi dungna, kita si enggo terdidik, pengajaren e erbahanca kita nggeluh rikutken si ngena ate Dibata, seh maka malem ateta (Heb.12:11).

Renungenta Heber 12:12-15 e me bagin pedah dingen kata pertenget man kalak si tek si ngenanami kiniseran. Lit piga-piga poin si banci si renungken arah teks enda:

• Kalak si ngenanami kiniseran, kote dingen la ergegeh. Tapi tetap arus erdalan i bas dalan si pinter gelah nahe si tersiher la ersuina, tapi gelah malem (ay. 12-14). Ertina, ula ngadi i bas kiniseran tapi terusken ndalani kegeluhen rikutken dalan si ituduhken Tuhan. Kalak si fokus nandangi kiniseran: mpeturah ate ndele, morah ate, aru ate, si erbahanca kita kote dingen geluhta pe banci murde. Tapi adi si terusken erdalan amin pe i bas kiniseran, i bas penegu-negu Tuhan si mesui ndai la ersuina tapi malem ibanNa. I bas kiniseran, fokuslah ku Tuhan.
• Meriahlah ras ise pe, janah usahaken nggeluh bagi si ngena ate Tuhan (ay.13). Bas perdalanen geluhta, salah sada si berpotensi mabai kita ku bas kiniseran e me cedana hubungen/relasinta ras kalak si deban. Khususna kalak si ndeher ras kita, e me si rusurna erbahanca luka bas pusuhta. Kata Dibata nuruh kalak si tek guna meriah ras ise pe. Meriah si imaksud labo i bas erti “menyenangkan semua orang” tapi uga kita ngasup ngaloken kalak si deban uga ia litna, dingen ngalemi dikune lit salahna man banta. Sabab e me singena ate Dibata sidalanken bas kegeluhenta.
• Jagalah maka sekalak pe ola surut i bas lias ate Dibata, gelah ola bagi sinuan-sinuan sipagit uratna, si turah nusahi nterem jelma alu racunna (ay.15). Rusur ngenanami kiniseran banci erbahanca kita labuh bage pe adi la paguh banci ndabuh. Dua dampar si perlu si tengeti dikune kita ngenanami kiniseran e me: Sipemena, Ola sempat kita surut i bas lias ate Dibata. Kiniseran Ola min mabai kita erdauhna ras Dibata, tapi sebalikna, ngasup min kita ngidah maka lias ateNa belinen asa kiniseran si nanami kita, dingen la pernah ibereNa perbeben lebih asa gegehta nggengkenca (bdk. 1 Kor. 10:13). Sipeduaken, Ola sempat kita bagi sinuansinuan si pagit uratna, si turah nusahi nterem jelma alu racunna. Kita perlu metenget sabab “bisa” kiniseran banci mpeturah pagit urat/akar pahit bas geluhta. Desken sinuan, pagit uratna, pasti la mejile batangna, jenari la banci iarapken buahna. Barclay M. Newman Jr, i bas kamus Alkitab Yunani – Indonesia nterjemahken pagit urat/akar pahit: menjadi pahit, bertingkah laku keras, iri hati, dengki dan sakit hati. Adi enda kerina lit i bas geluhta, tentu mabai kegeluhenta la dame, subuk i bas dirinta secara pribadi bage pe banci ncedai hubungenta ras kalak si deban.

I bas Garis Besar Pelayanen (GBP) gerejanta, salah sada misi GBKP e me menegakkan keadilan, perdamaian dan keutuhan ciptaan. Sue ras misi enda, perlu kal kita tetap erdalan i bas dalan si pinter si ituduhken Tuhan man banta. Sabab labo terpungkiri, i bas perdalanen kegeluhenta, erbage-bage tantangen si man alankenta, di kune la kita metenget banci papak perdalanen kinitekenta. Misalna adi melala kiniseranta, tapi la kita ernalem man Dibata, banci dungna turah kisatta guna ersembah man baNa. Apai ka di kune kiniseran e rehna tupung kita ndalanken si mehuli rikutken kinitekenta. Misalna tutus kal ateta ndahiken dahin pelayanenta, tapi ipersalahken kalak kita, adi la kita natap kempak lias ate Dibata, banci turah ukurta guna surut i bas dahin-dahin si iberekenNa man banta. Bage pe i bas jabujabunta, banci jadi melala perbeben si ngerim-rim kegeluhenta, si erbahanca erbera-bera ukurta. Tapi i bas kerinana, tetaplah erdalan i bas dalan si Pinter si enggo itetapken Tuhan man banta. Si inget uga turi-turin Jusup anak Jakub mbarenda, erbage-bage kiniseran si inanamina tapi la ia surut, terus ia erdalan, seh dungna geluhna jadi pasu-pasu man nterem jelma. Si erbahanca ngasup ia ngatakenca “jahat sura-surandu man bangku, tapi enggo isalihken Dibata e jadi si mehuli, gelah arah e banci iselamatken Dibata kesah nterem kalak si nggeluh denga genduari “(Kej. 50:20). Ngasup ia ngidah sura-sura Dibata bas kiniseranna. Marilah kita pe ernalemlah man Tuhan, Ola ngadi i bas kiniseran, tapi terus erdalan i bas lias keleng ate Tuhan. Teklah maka i bas perdalanen geluhta suka-duka ipakeNa guna kiniulinta. Di kune lit pe kalak si enggo nakiti kita, ngasup kita ngalemi ras ngaloken ia. Jadilah agen-agen perdamaian ras keadilan, si erpalas ku bas lias ate Tuhan.

Nuriken penggejapen (ibenaken arah si metuana-ku singudana)

Rende KEE No.331:1 (ibabai Song leader sektor)
Tegu aku anakNdu, bas perdalan geluhku

Diskusi (ipandu Serayan Tuhan)
1) Turiken pengangkanndu kerna kai saja pedah ras pertenget si isehken man banta i bas ndalani kiniseran erpalasken teks renungenta.
2) Turiken pengalamenndu tetap erdalan i bas dalan si Pinter aminna pe ngenanami kiniseran, ras kai ulihna.

Nehken persembahen : Rende KEE No. 386 :1-2 (ibabai song leader sektor)
Tuhan kap permakan geluhku ….

Pertoton sapaat ras itutup alu pertoton Tuhan (iaturken pengurus PJJ)

• Kerna persembahen
• Gelah perpulungen ras kerina serayan tetap nggeluh i bas dalan si Pinter amin pe mbue tantangen si man alanken
• Si turah i bas perpulungen ras jabu kundulen o Pertoton Tuhan

MOMO

JEDA RAS PENUTUP