SI MAN OGEN : Masmur 78:1-8
TEMA : NURSURKEN PENGAJAREN SI MEHULI
TUJUN : Gelah Moria:
- Nuriken pengajaren si mehuli i tengah-tengah Bangsa Israel.
- Ndalanken pengajaren si enggo iturikenna.
METODE PA : Studi Kasus
(Cara ngoge Masmur 78:1-8 alu responsorial antara Moria metua 41 tahun ku datas, Moria si nguda 40 tahun ku teruh).
Kata Penaruh.
Pengalamen nggeluh jadi pelajaren i bas kegeluhenta. Subuk si bagi ukurta bage pe pengalamen si la bagi ukurta. Pengalamen e banci ituriken jadi pelajaren ka ku sapih-sapih Moria bage pe kesusurenta (anak-anak ras kempu). Nuriken pengalamen si meriah entah la meriah labo mela. Sabap kerina e meherga i bas waktu-waktu kegeluhenta. Jadi pengalamen si meherga termasuk i bas kiniteken, sabap kerina pengalamen e mereken ulih ntah pe pengajaren si meherga. E maka perlu kal ituriken. Janah adi Moria si metua lanai lit si nuriken pengalamenna maka Moria si nguda pe la banci erlajar arah Moria situan asangken dirina.
Mpebagesi Pengangkan Kerna Ogen.
Ogenta enda nuriken kebiaren penulis (Asap) kerna Bangsa Israel si ngelupaken kai si enggo ibahan Dibata man tinepaNa i doni enda. Lit kebiaren Asap maka manusia enggo meriah akapna ndalani kegeluhenna, dingen lanai ersaksi man ise pe kerna pengalamen kegeluhenna ras Dibata. engarapen Asap gelah pengalamen-pengalamen kegeluhen enda ituriken nandangi kesusuren-kesusuren si arah pudi (estafet pengajaren). Situasi Bangsa Israel i bas konteksna enda lit i bas kiniseran bekas kinilasetianna, berontakenna ndube (rusia jaman si nuria), e maka arapen Asap gelah bangsa e tetap ngidah kesetian Dibata i bas kiniseranna. Ngingetken mulihi Dibata mulahi ia i bas kiniseran Mesir, ngarak-ngaraksa i padang gurun seh i Kanaan.
Asap/Asaf (Bin Berekhya Bin Simea) sekalak ahli musik kesusuren Suku Lewi i bas Bani Gerson nari nggeluh i bas jaman Daud. Lit 12 Masmur si suratkenna. la ras Heman, kempu Samuel bage pe Etan jadi si rende bage pe ernubuat i Rumah Pertoton (1 Kronika 25: 1-31; 2 Kronika 5: 12)
Ayat 1-4: Begikenlah ajarku nina, ia ngerana selaku kalak si enggo metua, enggo lalan pengalamenna asangken kalak si megi-megi pengajarenna. Lit kemegahen i bas ia nuriken pengalamen kegeluhen Bangsa Israel. Lit pigapiga cara si ilakoken i bas nuri-nurin e me arah Kuan-kuanen, perumpaman jaman si nuria ras nuriken perkara-perkara si enggo jadi. Asap make erbage metode nuri-nuri segelah teraloken kalak simegisa. Isina Dibata tetap ngarak-ngarak bangsaNa i bas kerina dampar kegeluhen enda, subuk i bas meriah bage pe kiniseran kegeluhen. Nina Asap la ateta sibuniken man anak-anakta, sabap adi Ianai lit sinurikenca maka generasi si nguda e lanai meteh kai si jadi nandangi nini-ninina, kai dage si banci ipelajarina? E maka perlu kal ituriken pengalamen-pengalamen si nai. Arah e ibereken pesan man si megi-megi kerna uga Dibata tetap ngarak-ngarak bangsaNa seh maka jore bangsa e i bas taneh si enggo isikapken Tuhan man bana.
Ayat 5-7: Pedah ras perentah ibereken Tuhan gelah iikutken. Ituriken Asap uga bangsa e arus patuh dingen ngikutken pedah guna kiniulin kegeluhenna. Labo terjeng patuh i bas ngikutkenca, tapi patuh pe guna meritakenca man kalak singudan asangken ja. I je me teridah gegehna tradisj lisan e. Ibahan kalak si tuan e waktuna guna mereken pedah ras pengajaren man kalak singudan asa ia. Alu cara petala-tala, ercakap-cakap alu mehuli. Sabap kalak singudan e lit nge sura-surana tole meteh dingen erlajar bas kegeluhen enda. Arah si e la bene pengajaren ras pengalamen er-Dibata. Seh ku kesusuren si ersundut-sundut.
Ayat 8: “Gelah Ola seri….” enda nuratken litna pengalamen pagit entah pe si la bagi ukur. Pengalamen pagit orangtua iturikenna man anak-anakna, jadi persinget gelah Ola inanami anakna si pagit bagi si inanami orangtuana. Enda me tujun bas nuri-nuri pengalamen si nuria jadi kata persinget, penjemba dingen ingan erlajar segelah wari si reh enda reh ulina sentudu ras sura-sura Dibata.
Pengkenaina.
Selaku Moria si enggo tuan asangken Moria sidebanna, la banci sinik dingen la nggit ngajarken. Adi ia la ermedite nandangi Moria singudan asangken ia, bali ras la idalankenna tugas tanggungjabapna bagi Kata Dibata enda. Ula min lit bas ukurna kata-kata “turiken pe man kai? Labo kari begikenna…. me enggo tehndu uga Moria si nguda genduari e? Turiken pe kari lawanna ka kita” i je me terbeluh cara komunikasi si mehuli. Sabap Moria si enggo metua e enggo ngenanami mbue pengalamen nggeluh. Dirina pe pernah nge iajari Moria si tuan asangken ia ndube. E maka perlu nginget pengalamen-pengalamen nggetuh si man turinken rikut carana si payo pe gelah teraloken senina Moria si nguda. Ola kari kata si ni belasken e erbanca kitik ukur Moria si nguda, daramilah cara si tepat guna mpesehsa. Turikenlah penggejapen ras Dibata, seh maka si man turinken e kerna Kuasa Dibata si Mbelin, subuk nampati, ngajari, mpersingeti, ngkawati, nemani ras sidebanna. Man Moria si nguda denga berekenlah cuping ras pusuh guna megiken ras ngantusi kai situriken Moria si metua.
Studi Kasus:
Nd. Sarangeo umurna 35 tahun, ia Moria si mejingkat, semangat, pengurus Moria ka ia. I bas kinijingkatenna e rusur teridah kurang ermediate nandangi kebaktin-kebaktin si enggo iaturken. I bas jabu pe kurang ermediate man perbulangen ras anak-anak. Kesenangenna saja nge ipebelinna. Adi paksana mejile perukurenna reh ia ku PA Moria, ku sermon PA Moria, bage pe ku Gereja. Tapi adi la bage atena, labo ia idah pe. Beluh ia erbahan 1001 alasan. Erkiteken si e, nterem Moria-Moria e kurang senang man bana. Lit pengakap maka labo atena tutus ndahiken dahin Moria e, dingen la jadi usihen man Pengurus Moria si debanna bage pe sapih Moria. Nd. Germet termasuk Moria si metua, umurna enggo seh 52 tahun. Sekalak si mejingkat dingen tutus i bas kepulungen-kepulungen Moria. la pe rusur iperdiatekenna situasi bas Moria e. Teptep pengalamen meherga dingen lit makna ibassa. Erbuena erlajar reh pentarna kap.
Diskusi:
1) Kai nge situhuna arapen Moria si enterem e nandangi Nd. Sarangeo?
2) Kai nge si perlu ilakoken i tengah-tengah Pengurus Moria bage pe antara Moria si metua ras Moria si nguda erpalasken situasi i datas enda ndai?
3) Bicara kam i bas posisi Nd. Germet coba turiken kai si ilakokenndu!
