Jadi pasu-pasu man diri sediri/ Me Time
SI MAN OGEN : Pengerana 5:18-20
T E M A : NGERGAKEN DIRI
T U J U N : Gelah Moria:
- Nggargari ullih latih si ibereken Dibata.
- Mbandingken kinata geluh tupung ngenanami ras la ngenanami ulih pendahin.
METODE PA : Nulisken surat man diri sendiri.
Kata Penaruh.
Moria/nande ndatken tanggungjabap si mbelin i tengah-tengah jabu. Nikapken pangan ras inemen, anak sekolah, kebersihen rumah, ngelayasi paken isi jabu, erdahin, nikapken keperlun jabu seh ku bas ndarami pinjamen (adi perlu) bage pe nggalarisa ras si debanna. Banci ikataken Moria ikut muat bagin i bas kerina urusen rumah tangga. Moria si lit asisten rumah tanggana pe la terlepas i bas tanggungjabap guna ngurusi rumah tangga. Gia latih erdahin, urusen rumah pe harus ka nge iperdiateken. Latih pe iakapna, ipaksana tetap erdahin; melihe pe ia ipelebena isi jabuna man, gulut pe iakapna ipala-palaina guna pesenangken isi jabu. Nginget kerina perjuangen nggeluh, Moria megati lanai ngasup ngenanami ulihna latih. Tempa-tempa rugi si akap guna pesenangken dirinta gelah isi jabunta banci sikap kerina keperlunna. I bas erjuang guna kerina tanggungjabap, perlu ka nge si perdiateken diri gelah teneng ras tambah gegeh guna ndahiken dahin. Istilahna e me “me time”, si ertina mereken waktu ras mperdiateken diri, subuk kula bage pe tendi.
Mpebagesi Pengangkan Kema Ogen.
Kitab Pengerana itulisken sekalak si pentar i bas ngertiken erti kegeluhen i doni enda. Pengerana 5 enda secara kusus nuriken maka kegeluhen manusia Dibata kap empuna. I bas paksana tadingken me kerina, sia-sia si nasa lit (ay.16), e maka la lit si terpentingen seakatan erkemalangen man Tuhan (ay.7). Enterem jelma si ngayaki sura-surana, banci saja erta ntah pe kuasa. Tempa-tempa kempak si e me kerina palas keriahen ras kepuasen i bas doni enda. Seh maka lanai ieteh tumburen guna ngelitken si e kerina. Gulut ukur ngukurisa suari ras berngi. Nggo pe melala si terpepulung, kurang mbue denga. Apai ka adi kurang, latih ukur ertangkel, piahna perpan ras pertunduh pe lanai jore. Erbera-bera i bas pusuh, uga nge kari kedungenna. Nina Pengerana: sia-sia nge kerina, sitadingken nge pagi kerina, e maka ermeriah ukurlah.
Ayat 18, nina Pengrana, sekerajangen manusia i bas doni enda terjeng minem, manken ulih pendahin ras ngenanami ulih latih. E me si mehulina. Emaka nanamilah kai si lit, riahken uga litna sabap gendek-gendek nge umur manusia, tapi icukupi Dibata kerina keperlun sedekah ia nggeluh i doni enda. E nuduhken maka Dibata nge si mpekena-kena kegeluhen manusia, la lit si man kebiaren.
Ayat 19, nuriken maka kiniliten enda Dibata kap empuna dingen IA si merekenca. Kalak si nggejapken pemere Dibata e dingen ngasup ngenanamisa, sangap kap ia. La terjeng kebayaken e ngenca si jadi kesangapen, tapi kengasupen guna ngenanamisa pe kesangapen kap e. Kepeken la kerina manusia ngasup nggejapken kebayakenna. Megati kalak bayak i bas erta tapi musil iakapna bana sabap kurang dengan iakapna rusur, mankenca pe ia mbiar. Kalak si bage la banci ermeriah ukur i bas geluhna. Dibata mereken kesempaten guna ngenanami kinibayaken i bas si e oratna ngasup ngataken bujur sabap kesempaten pemere e Dibata kap.
Ayat 20, nuriken kerna idemi Dibata pusuhna alu keriahen, e me keriahen si rasa lalap. Ertina, keriahen e la erkiteken situasi kegeluhen tapi erpalasken penggejapen Dibata kap si empuna kegeluhen, la lit si man kebiarenken. Kalak si bage tentu dame pusuhna katawari paksa pe. Erkemalangen man Dibata mabai pengangkan maka Dibata kap si empuna geluh, e maka lanai aru ate kerna kai pe.
Pengkenaina.
Laura Day (2006) i bas bukuna “Practic Intuition” ngataken maka diberu lebih peka ibandingken dilaki. Diberu mesukah iakapna ngenen situasi, janah meter muat tindaken. E maka diberu ngasup meteh katawari anakna muas, melihe, mbiar, mbergeh, merawa ras sidebanna. Kengasupen enda pe banci mabai diberu ku bas kearun ate. Kearun ate kerna duit, waktu, kesehaten ras si debanna. Si e banci mabai Diberu ngelupaken keperlun dirina. Sia-sia akapna, madin guna belanja dapur, nukur susu anak, bage pe nukur keperlun perbulangen gelah ula tulpak. Dungna cenderung “stress”, bosan, lelah, kurang akapna iperdiateken.
Bahan PA Morianta Minggu enda ngatakenca maka Dibata kap si empuna geluhta, ula aru ate. Nikmati geluhta, perdiateken dirinta, gelah sigejapken kemalemen ate i bas umur geluh si gendek enda. Mereken waktu guna dirinta jine (“me time“) situhuna labo rugi, tapi untung. Sabap adi nggo si pesenangken dirinta tentu meriah ukurta, teneng kula tendinta, tambah gegehta ndahiken dahinta selaku nande. Banci si bayangken, ntah ku ja deba nahenta erjingkang, kai deba idadap tanta, kai deba si iukurken otakta, piga barang si inehen matanta, latih akapna kerina. Me time enda desken nggarut sabi-sabi gelah ntelap mulihi. Adi sabi-sabi nggo ndekahsa ipake, tumpul, perlu igarut (igerenda) gelah entelap mulihi. Kula tendita e pe bage ka nge. Me time si lakoken guna mperiahken ukur alu ndalanken hobbynta, banci ku salon, nonton, belanja, gawah-gawah, olahraga, medem, man pangan ras si debanna. Kerna waktu pesenangken dirinta enda pe banci siaturken sue ras situasi jabunta. Labo tiap wari, tapi lit waktuna. Alu bage kita nggo jadi pasu-pasu man dirinta gelah ergegehna ka pe kita jadi pasupasu man isi jabunta bage pe sekelewetta. Selamat menikmati hidup.
Aksi: Nulis Surat Man Diri Sendiri
Kertas ras pulpen enggo isikapken.
Atur perkundul si teneng dingen nyaman. Pakeken waktu guna ngukuri perdalinen geluh.
- Daftarken kai saja si enggo ilakoken teptep bagin i bas kulandu teptep wari, kenca e oge mulihi, gejapken perjuangen kulandu e segedang wari.
- Tulisken surat alamatna e me kap gelarndu. Surat enda man dirindu jine, si isina ngataken bujur i bas kerina perjuangen dirindu, apresiasi (pujiken) dirindu bas suratndu, janah erjanjilah man dirindu i bas suratndu maka ku lebe wari enda kari berekenndu hadiah man bana si erbahanca ia senang.
- Ertotolah i bas pusuhndu kerna perjuangen dirindu sedekah enda, janah pindo gegeh man baNa guna tetap erjuang dingen gelah ngasup kam ngergaisa.
Dirimu sendirilah sahabatmu yang paling setia.
Ia takk pernah meninggalkkanmu, ia punya cinta, punya perasaan,
dan punya batas kemampuan.
Hargai dan perhatikanlahh supaya ia tetap kuat berjuang bersamamu (alemgintings)
